Non, c'n'est nie par habitude

Non, c'n'est nie par habitude

Mais qu'ça va râte, mais qu'ça va râte!

Haïer nos astinn's à l'nouvel'année et audjord'hui nos vla au carnèval dè l'Estennes.

On n'a nie l'temps dè l'vîr arriver qu'il est dja d'allé. On n'a nie l'temps d's'apprester, nie d'y sondgie... presque, et il est dla outte.

C'est l'cas dè l'dire, les biaux djoûs pass'té pus râte què les monvais.

No carnèval c'est-st-à pau près comm'in rêve, i chuffel comm'el vint d'bise, i passe aussi râte qu'in avion à réaction a put passer.

Nos astinn's "avant-carnèval" et nos vla dja "après-carnèval".

Heureus'mint qu'après-carnèval vût dire avant-carnèval, à partir dè maint'nant nos sondgeons au cie'n qu'nos frons... l'année qui vie'nt... si nos astons co là.

C'est-st-ainsi què dèpuis des sièkes les Binchous pass'té d'iun à l'aute sans s'in rinde compte et qu'pou fini, leû vie t't'intière, is dis'té qu'is sont "avant-carnèval".

Nos y sondgeons, nos l'aspirons, nos l'apprestons, nos l'saquons avec nos dints, comme si ç'astoût el'sommet du pus grand des bonheurs qu'on pût trouver d'su la térre.

Vos avez biau avouâr fait l'dgille dix coups, vingt coups, cinquante coups, c'est toudis avec el'même aspiration què vos attindez carnèval, c'est toudis avec el'même frisson què vos intindez les premie'ns coups d'baguettes, ou bie'n l'son du premie'n appertintaille.

C'est toudis avec el'même émotion què, l'mardi-gras avant l'piquette du djou, vos infilez vo maronne qui n'est maronne qu'in djou, mais el'pus belle maronne dè vo vie, comme l'écrivout iun d'mes camarâdes.

Non, c'nest nie par habitude qu'in Binchou fait l'dgille.

Si ç'astoût par habitude, est-c'qu'i sintiroût ses gambes trianner quand i voit el'louageur lyï apporter s'capiau?

Si ç'astoût par habitude, est-c'qu'il arroût co, après cinquante coups put-ête, les larmes à z'ies quand el'bourreu met l'première torquette dè strangne intré s'kèmîche et l'blouse dè dgille? Si ç'astoût par habitude, est-c'qu'i laich'roût co kèï des larmes quand l'tambour vie'nt l'ker el'mardi-gras à chinq heures au matin?

Si ç'n'astoût qu'in habitude, est-cequ'i s'roût co stoffi, au point dè n'pus savouâr in dire ieune, quand el'mardi-gras au matin i rinconte iun d'ses camarâdes qui n'pût pus, ou qui n'sait pus l'fer?

Non, pou l'Binchou, fer l'dgille s'est-st-in sacerdoce, in d'vouâr sacré, in d'vouâr qu'i donne à fer à ses infants quand i n'sè sint pus capâbe dè fer in biau dgille, quand i n'sait pus iètte in vrai dgille dè Binche - fier - orgueilleux - ardent et jamais -scran....